De xira por España. Bicentenario do Museo Nacional del Prado

Actualizado 08/03/2019 00:00

museo de pontevedra

O Museo Nacional del Prado programou De xira por España, unha exposición na que, para conmemorar o seu bicentenario, a institución cede durante un mes unha obra de especial relevancia das súas coleccións a diferentes museos de España, un por cada comunidade e cidade autónoma. No caso de Galicia, seleccionou como sede o Museo de Pontevedra, onde se exhibe o Retrato dun médico, asinado por El Greco en Toledo cara a 1582-1585.

Esta obra permanecerá exposta no Sexto Edificio desde o 18 de marzo ao 21 de abril.

Retrato dun médico
El Greco (Candía, Creta, 1541-Toledo, 1614)
1582-1585. Óleo sobre lenzo

O cabaleiro representado no lenzo do Museo do Prado foi identificado como médico por levar no dedo polgar un anel, distintivo entón desta profesión, e por aparecer o cadro así rexistrado nos inventarios do século XVII do Real Alcázar. Probablemente sexa un retrato de Luis Mercado, catedrático e médico da Real Cámara, ou de Rodrigo de la Fuente, “o médico máis famoso de Toledo”, segundo relatou Cervantes en La ilustre fregona. A composición lembra os retratos de intelectuais realizados en Venecia no século XVI, incluído o ademán retórico da man dereita.

O 19 de novembro de 1819 inaugurouse o Real Museo de Pinturas y Esculturas, que co tempo adoptaría o seu nome actual de Museo Nacional del Prado. Desde as súas orixes, este museo tivo como sede o edificio que deseñou en 1785 o arquitecto Juan de Villanueva para aloxar a Academia de Ciencias Naturales e o Gabinete de Historia Natural. O seu excepcional patrimonio, cuxa orixe foron as coleccións reais, foise acrecentando constantemente con adquisicións e doazóns; e comprende pinturas, esculturas, debuxos, estampas, artes decorativas, fotografías e fondos bibliográficos e documentais.

Acompañando este interesantísimo retrato quixemos expoñer dúas versións de famosas obras do xenial pintor, ambas as dúas custodiadas no Museo de Pontevedra desde a década de 1940 e exhibidas desde entón no edificio Castro Monteagudo.

Estes lenzos son A expulsión dos mercaderes do templo, unha destacada copia saída do activo taller de El Greco e San Pedro e san Paulo, unha copia anónima da primeira metade do século XVII que, nalgún momento, estivo atribuída a Jorge Manuel Theotocópuli, fillo e discípulo do mestre. Esta última é unha das moitas obras que o Museo Nacional del Prado mantén depositadas desde 1860 en diferentes museos de España, e forma parte do conxunto de 76 creacións que depositou no Museo de Pontevedra, algunhas delas desde a súa inauguración en 1929.

ACTIVIDADES COMPLEMENTARIAS

Obradoiro para nenas e nenos impartido polo Gabinete Didáctico

Día 30 de marzo, de 11:00 h a 13:00 h.

Idades: de 7 a 13 anos

Nº de prazas: 15

Inscrición: De luns a venres de 9:00 a 14:00 horas no teléfono: 986 804 100 ext. 42413 ou enviando un correo electrónico a: gabinetedidactico.museo@depo.es

Visitas guiadas

Sábados ás 18h

Imparte persoal de Gabinete Didáctico.

Non se precisa concertar cita.

(Para visitas guiadas en grupo contactar previamente co Gabinete Didáctico)

Deputación de Pontevedra Museo de Pontevedra